اين يذهب هذا الرجل طوال السنة ؟؟.... و اين ذهب هذا العام ؟

اصحى يا نايم

اصحى يا نايم

اصحى وحد الدايم

و قول نويت ان بكرة حييت

الشهر صايم

و الفجر قايم

اصحى يا نايم

وحد الرزاق

رمضان كريم

المسحراتى كان بيمر من تحت البيت و انا صغيرة و بمجرد ما اسمع صوت طبلته و هو بينده اسماء كتير و منها كتير مش فى الشارع و اغلبها اسماء ولاد بس بينده و خلاص باسماء كتير اجرى و اقول يمكن يقول اسم حد من بيتنا لكن دايما سؤالى بعد ما يمشى لامى هو بيروح فين باقى السنة تقولى هو بيظهر بس فى رمضان زى حاجات كتير مش بتكون غير فى رمضان زى الفوانيس و الياميش كنت بسكت بس اجابتها كانت مش بترضى فضولى انى اعرف هو بيروح فين ... روحت لجدتى اسالها - الله يرحمها يا رب - قالت هو ده مسحراتى ده ايامنا كان المسحراتى غير كدا كنا بنقف له بالفوانيس فى البلكونات و اول ما يقول اسمنا ننزل جرى وراه بالفوانيس لحد اخر الشارع نصحى باقى الولاد و كان بيقول مواعظ و حكايات مختلفة عن الصفات الوحشة و الكويسة و سالتها هو بيروح فين باقى السنة قالت الله اعلم زمان كان واحد بيعمل كدا بدون مقابل محبة و كسب ثواب و بيشغل طول السنة حاجة تانية لكن اليومين دول_ ده من 10 سنين الحوار ده - اى حد بيخبط عليكى الباب فى العيد و يقول انه المسحراتى و عايز العيدية

السنة دى لسه مش ظهر المسحراتى

و السؤال اصبح .. هو فين راح المسحراتى ؟؟

اسال الله لكم رزق مريم و قصر أسيا و تقوى عائشة و قلب خديجة و رفقة فاطمة و جمال يوسف و مال قارون و ملك سليمان و صبر ايوب و عدل عمر و حياء عثمان و وجه على و محبة الرسول عليه افضل الصلاة و السلام و ميعاد ال ياسر
ربنا تقبل منى الدعاء
و كل سنة وانتم طيبين

......رتب الاحداث ترتيبا صحيحا او منطقيا
زمان و انا صغيرة كنت بحب العب لعبة ترتيب الاحداث و اكتشف الفوارق بين الصورتين و كنت بستمتع جدا بها و لما احلها فى وقت قصير احسن بذكاء خارق دلوقتى معرفش هل ذكاء قل او ان اللعبة بقت غير منطقيةجربوا معايا كدا الاحداث دى ترتبها صح و منطقى ولا انا اللى ذكائى قل
نشرت الاحداث التالية حول تصريحات بابا الفاتيكان bbc
الجمعة 15 سبتمبر
الفاتيكان يستعد للغضب الإسلامي
يشعر الفاتيكان بقلق بالغ إزاء احتمال وقوع أعمال عنف ضد دولة الفاتيكان صغيرة المساحة، والتي تقع في قلب روما، بعد سيل الانتقادات من جهات إسلامية في العديد من البلدان ضد البابا بنيديكت السادس عشر
فقد أثارت تعليقات البابا بنيديكت في وقت سابق والتي انتقد فيها مفهوم الجهاد في الإسلام، تعليقات معادية في العديد من البلدان الإسلامية.
وتم تصعيد الإجراءات الأمنية بشكل غير ملفت في مدينة الفاتيكان المحاطة بالأسوار، وإن كان البابا بنيديكت نفسه ليس في مقره بها في الوقت الراهن.
فالبابا يستريح بعد جولته الأخيرة إلى ألمانيا في المقر البابوي الصيفي في جبال الألب.
ويبدو أن الغضب العارم الذي أعرب عنه رجال دين ومعلقين مسلمين إزاء اقتباس البابا من كتاب دوِّن قبل ستة قرون يحتوي على أقوال إمبارطور مسيحي من بيزنطة القديمة، أثار المسؤولين في الفاتيكان بالدهشة.
وقد تحدث الإمبراطور البيزنطي عن أمر النبي محمد "بنشر الدين الذي نادى به بالسيف".
------------------------------------------
الاثنين 18 سبتمبر
نص بيان البابا الشخصي
فيما يلي نص بيان البابا بندكتوس السادس عشر الذي أعرب فيه شخصيا عن أسفه العميق على خلفية ردود الفعل وخطابه الذي احتوى اقتباسا اعتبر مسيئا لمشاعر المسلمين.
الإخوة والأخوات الأعزاء: إن الزيارة الرعوية التي قمت بها مؤخرا في بافاريا كانت خبرة روحية عميقة، جمعت ذكريات شخصية ترتبط بأماكن أعرفها معرفة جيدة ومبادرات رعوية نحو إعلان فعال للبشارة اليوم.
أشكر الله للفرح الداخلي الذي منحني إياه، كما أشعر بالامتنان لكل الذين عملوا جاهدين لنجاح هذه الزيارة الرعوية.
وكما هي العادة، سأتحدث أكثر عن ذلك خلال الاجتماع العام الأربعاء المقبل.
وفي هذا الوقت، أود أيضا أن أضيف أنني أشعر بأسف عميق لردود الفعل في بعض البلدان لفقرات قليلة من خطابي بجامعة ريغينسبورغ، والتي اعتبرت مسيئة لمشاعر المسلمين.
لقد كانت هذه في الواقع اقتباسا من نص يرجع للعصور الوسطى، ولا يعبر بأي صورة عن فكري الخاص.
وأمس نشر الكاردينال وزير الخارجية بيانا بهذا الصدد شرح فيه المعنى الحقيقي لكلماتي.
آمل أن يعمل هذا على تهدئة القلوب وإيضاح المعنى الحقيقي لخطابي، والذي بالنظر إليه مكتملا كان وما يزال دعوة لحوار صريح وصادق، باحترام عظيم متبادل.
----------------------------------------
الثلاثاء 19 سبتمبر
شيخ الأزهر يوجه انتقادات شديدة لبابا الفاتيكانوجه شيخ الازهر محمد سيد طنطاوي يوم الثلاثاء انتقادات حادة للبابا بنديكتوس السادس عشر بسبب استخدامه اقتباسا من العصور الوسطى أثار احتجاجات واسعة بين المسلمين في أنحاء العالم.
وقالت وكالة رويترز للانباء ان شيخ الازهر اوضح خلال لقاء مع ممثل الكنيسة الكاثوليكية في القاهرة الاب يوحنا قلتة ان البابا "سكت دهرا ونطق كفرا."
وأضاف طنطاوي أن البابا لم يرفض ما قاله عن امبراطور بيزنطي بان النبي محمد لم يأت الا بكل ما هو شرير وغير انساني.
واضافت رويترز ان شيخ الازهر قال "كان من الواجب على البابا عندما ذكر هذا الكلام أن يعلق عليه وأن يرفضه، ولكنه لم يرفضه فيكون في هذه الحالة كأنه هو الذي قاله."
وقال شيخ الازهر "نحن نقول يجب أن يعتذر صراحة وأن يقول ان ما ذكرته قاله فلان وأنا أعتذر عن أني لم أعلق."
وأضاف "نحن نريد اعتذارا واضحا وصريحا بأن ما قاله كان كلاما سيئا وأن يعتذر عنه."

---------
هو مش مفروض برده ان الاحداث تكون بالعكس يعنى الشيخ الاكبر للازهر الشريف منبر الاسلام فى الشرق الاوسط (على حسب كلام الازهر) انه يكون اول شخص يقوم بالرد على البابا و المطالبة بالاعتذار الفورى و بعد كدا البابا يعتذر و الناس هناك تخاف و تقول المسلمين زعلانين لدرجة ان البابا نفسه اعتذر
طيب هو الشيخ الاكبر اتاخر ليه فى الرد ؟ و لما الناس تخاف و تأمن نفسها بعد التصريحات ورد الفعل ده بياكد ايه ؟و لما يعتذر البابا بطريقة اسفه العميق لردود الفعل -يعنى اسفه مش على الكلام - و ان الكلام مش كلامه - مع العلم ان دى كانت محاضرة علمية يعنى مدروس كل كلمة فيها و مدى رد فعلها و ايه هدافها - ده معناه ان قصده من ده كله ايه ؟

يظهر فعلا ان ذكائى قل و حاجات كتير مش فاهمها :(

ردا على تاج من العزيزة مونى ......... هذه ارائى المتواضعة

هل انت راضى عن المدونه شكلا و موضوعا؟

شكلا لا لانه ديزاين استاندر مش بيعبر عنى يعنى ،اما موضوعا فانا لسه بقول يا هادى بحاول انظم افكارى

هل تعلم اسرتك الصغيره بامر مدونتك؟

لا الشخص الوحيد اللى بيعرف عنها هو اللى عرفنى يعنى ايه مدونة و هو اللى بيساعدنى لما اتزنق فى حاجة مش فاهمها

هل تجد حرجا من ان تخبر صديقا عن مدونتك؟

و الله حسب الصديق يعنى لو فى صديق قريب و بتكلم معاه بفضفضة ممكن اقوله ..غير كدا لا

هل تسببت المدونات بتغير ايجابى لافكارك ؟ اعطنى مثال فى حاله الاجابه بنعم

بالنسبة لى لانى جديدة لسه تاثرها مش قوى بس فى مدونات حسيتها انها بتتكلم عن لسانى و بتقول اللى جواياو من المدونات اللى اثرت فيا مدونة ايوه خدامة و من كام شتا و كلبوزة لكن سمباتيك

هل تكتفى بفتح صفحات من يعقبون بردود فى مدونتك ام تسعى لاكتشاف المزيد؟

لا بصراحة اللى بيرد عليا - هم تلاتة اربع لحد دلوقتى - لازم اروح و اشوف مدونتهم واعرف اكتر عنهم و منهم بروح لمدونات تانية

ماذا يعنى لك عدد الزوار..هل تهتم بوضعه ؟

و الله يهمنى اكتر الردود من الزوار

هل حاولت تخيل شكل اصدقائك المدونين؟

طبعا و حتى من غير ما احاول ده بلاقى نفسى اترسمت ملامح للكاتب من غير ما احس و الله اعلم صح ولا لا طبعا

هل تشعر ان مجتمع التدوين مجتمع منفصل عن العالم المحيط بيك ام متفاعل مع احداثه؟

فى مدونات روحتها نشيطة جدا زى منال وعلاء و فى مدونات لناس بتخرج اللى جواهاو بس زيى كدا :)

هل ترى فائده حقيقيه للتدوين؟

اكيد والا مكنتش اشتركت فيها كفاية ان الواحد يلاقى مكان يفضفض فيه حتى لو محدش سمع ولا شاف

هل يزعجك وجود نقد بمدونتك ام تشعر انه ظاهره صحيه؟

حسب النقد يعنى و انا بمر على المدونات لاقيت واحد نقده ما هو الا شتيمة و ده طبعا مرفوض و مقابلش به لكن نقد بهدف النصح او لفت النظر لغلط معين عادى مش هيزعجنى المهم الاسلوب

هل تخاف من بعض المدونات السياسيه وتتحاشاها؟وهل صدمك اعتقال بعض المدونين؟

لا مش هتحاشاها هتابعها لكن لو هى ممكن يحصل من وراها مشاكل ممكن مش اكتب فيها و طبعا اتصدمت من قصة الاعتقال دى لان مفروض يعنى ان البلد فيها حرية راى و صحافة و ربنا يستر علينا

هل فكرت فى مصير مدونتك فى حال و فاتك؟

لا بصراحة . بس كفاية ان فى ناس ممكن تفتكرنى و تقول الله يرحمها .. هاحتاج ايه بعد الموت غير الدعوة دى حتى لو المدونة بقى مالهاش وجود ؟؟

مين اكتر مدونين اثروا فيك و ليه؟
و الله انا لسه مستجدة فى عالم التدوين و اظن حكمى دلوقتى لسه بدرى عليه

مين من المدونين بتحس انه يشبهك؟

لا مش شبهى بس فى ساعات كلام بقراه فى المدونات بحس انه بيعبر عن اللى جوايا زى اخر موضوع لايوه خدامة عن تمثال رمسيس .. ستة مليون علشان يتنقل ليه يعنى ؟و الله حاجة تحرق الدم

اكتب اسماء خمس مدونين ليقوموا بهذا الاستقصاء بعدك

ايوه خدامة

من كام شتا

MoSaic

مجرد وجهة نظر

طيارة ورق