بين ايديك

نفسى انساك

نفسى لما اشوف اتنين بيحبوا بعض مش اشتاق لحضنك

نفسى لما اسمع اغنية عن الفراق و اد ايه هو صعب ..عيونى متبكيش

نفسى لما اتكلم مع اى حد ..حروف كلامك متنطش على لسانى و استخدمها

نفسى لما اسرح بخيالى .. مابتسمش لفرحة معاك او متوجعش لهجر بينا

نفسى لما انام .. احلامى و كوابيسى متكنش انت البطل فيها

.. نفسى بجد حبيبى انساك

قبل ما يقتلنى ببطء جفاك

.. بس مش بايدى

بقلبى اللى بين ايديك بيتمنى رضاك

تشترى كلى ؟؟ وان دولار

جاءنا الخبر التالى من ال بى بى سى
رفعت امرأة من محافظة المنوفية في مصر دعوى قضائية على زوجها تتهمه فيها ببيع إحدى كليتيها في السوق السوداء.
وقالت المرأة، التي تدعى وردة محمد البنا، إن زوجها، سعد حلمي، قال لها إنهما سيذهبان لزيارة أقاربهما ثم اعطاها مشروبا من عصير البرتقال قبل أن يغادرا المنزل.
وأضافت أنها فقدت وعيها بعد ذلك في الطريق وبعد ان عادت إلى الوعي وجدت نفسها في احدى المستشفيات الخاصة في حي مصر الجديدة في القاهرة.
وقال لها زوجها مفسرا الأمر إن حادثا وقع لها في الطريق.
وبعد فترة قصيرة بدأت تشعر ببعض المتاعب الصحية، وأظهرت التحاليل والاختبارات أنها فقدت إحدى كليتيها.
ووجهت السلطات الاتهام إلى الزوج ببيع كلية زوجته بمبلغ 2700 دولار في السوق السوداء التي تشهد انتعاشا في مصر لهذا النوع من تجارة الأعضاء.

الخبر ده لما قريته فكرنى بيأجوج و مأجوج لما يخلصوا على اليابس و الحى هياكلوا بعض

هو احنا خلاص وصل بينا الحال اننا نبيع لحم بعض ؟
يعنى الواحد يكون قاعد وسط اهل بيته و خايف ان يكون واحد منهم طمعان فى رجله و لا فى عينه ؟؟
الرجل ده مفكرش ان الفلوس دى ممكن تتصرف علاج لمراته نتيجة عملته ؟؟ ولا وقتها هيرمها فى طرقة من طرقات المستشفيات المجاني تستنى دورها بعد شهور فى الغسيل الكلوى ؟؟
اللى مش متجوز طيب هيبيع مين امه .. ابوه .. اخواته ؟؟


ارحمنا يا رب برحمتك

مين احلى نانسى عجرم ولا عمرو دياب

من كام يوم كنت فى زيارة عائلية و كانت تجمع بين ازواج و بنات و اولاد واصبحت العادة ان التليفزيون يكون مفتوح على طول حتى لو محدش بيتفرج عليه.. نوع من التغلب على الخلفية الصامتة لو الكل سكت فجاة
و فعلا الكل سكت فجاة لما بدات اغنية نانسى عجرم فى حفلة كانت عاملها و لابسة فستان جميل اهو..

و بدات التعليقات عليها من انها امورة و مغرية و بريئة و اغلب التعليقات كانت من الجانب الرجالى لكن الزوجات كان فى حقد و غيرة منها و ده بان لما اتقال البركة فى عمليات التجميل .. اصل الفلوس تعمل اكتر من كده ..هى الاخلاق باظت من شوية
و انتهت الاغنية و لكن سابت اثارها فى الناس من رغبة ، لتمنى ، لغيرة ، لتدبير لخناقة قبل النوم او يمكن حتى فى الطريق للبيت

بعدها بشوية طل علينا عمرو دياب باغنيته الجديدة و هو مصورها فى امريكا مع بنت موديل فعلا جميلة بردو




و تانى التعليقات بدات على الموديل بس البعض كانت مش عجباه لانها رفيعة حبيتن تلاتة
و هنا انا استغربت
فين عمرو دياب طيب من الحوار ده ؟؟
و قلت عمرو دياب كمان احلو اوى وشكله صغر
و كان رد الفعل كالاتى البنات قالوا اه فعلا بقى احلى ده بقى واووو و الولاد منهم اللى قال انا اشتريت نضارة زى بتاعته و اللى قال اه اصله عمل عملية تجميل و التالت اناعجبنى انه عنده عضلات
اما الازواج فسكتم بكتم
يمكن واحد علق منهم انه عامل مكياج
.
.
ليه طيب الرجل من حقه يتغزل فى اى واحدة حلوة و يتكلم عن مفاتينها و عن لبسها و عن دلعها
و الست متقدرش تفتح بؤها و تقول اه الرجل ده عجبنى فى استايل ليبسه او عيونه او او
خالينا بعيد عن الدين لان الدين كان واضح و صريح ان الاتنين لازم يغضوا البصر

دايما الرجل شايف نفسه لا يعيبه شىء غير جيبه و انه فى اى وقت هو مرغوب و مليون واحدة ترضى به
لكن الست مليون حاجة تعيبها من اول شعرها لو مش مقصوص كويس لحد صوباع رجلها الصغير لو فيه كالو

هى الست مالهاش نفس هى كمان يكون زوجها مهتم بنفسه و بشكله
هى الست لما بتشوف رجل تانى شكله جذاب مش بيعجبها
ولا الرجل دايما بيقنع نفسه ان مراته مش هتبص لحد تانى و يعجبها
ليه الرجل بيندب حظه لما يتفرج على الكليبات اللى فيها فنانات و كأنه هو مثلا نجم من نجوم السينما و اتجوز الانسة حنفى؟؟
طيب فكرت للحظة لو واحد زيك نانسى عجرم دى شافته هيعجبها ولا لا ؟؟
فكرت للحظة انك لو فعلا وفرت لمراتك الفلوس اللى تعمل بها عمليات تجميل و تروح لاكبر بيوت ازياء و موضة هتكون عاملة ازاى ؟

بتنهار الرجالة على دلع نانسى
و جسم هيفاء
و عيون رولا
وشفايف اليسا

طيب خدوا بالكم بقى لان فى
عيون عمرو دياب
ابتسامة صابر الرباعى
شعر وائل كافورى
وحنية فضل شاكر

اخر الكلام
انا مش بقول كل واحد يبص على مزاجه و يقول اللى عجبه
انا هنا عايزة كل واحد يفكر قبل ما يتكلم عن جمال واحدة مشهورة قدام زوجته او حبيبته لان المقارنة انت كمان مش هتنجح فيها و زى ما المقارنة مش هتعجبك بينك و بين عمرو دياب بلاش بردو تقارن بينها و بين نانسى عجرم

ملحوظة
مسألة الجيب دى-اللى بيقول الرجل انها الشىء الوحيد اللى يعيبه - موجودة بردو عند المشهورين دول و يمكن اغنى مننا كلنا