بدور على محبوبى .. وحدوووووووووه...

احترنا كتير انا و اصحابى هنتجمع و نفطر فين سوا السنة دى و اخيرا وصلنا اللى اننا نعيش جو الاصالة و التراث
واختارنا الحسين
راح صديق حجز فى الدهان بتاع المشويات لانه بيكون زحمة جدا ولازم بالحجز
و اتصل بينا كلنا و قال انها وجبات كل وجبة طبق رئيسى من المشويات و سلطة و خشاف
الوجبات كباب مشكل - حمام محشى - موزة
انا اخترت حمام لانه معروف الهوية لكن اللحمة الله اعلم
و قررنا نتقابل بدرى علشان نختار موقع كويس فى ترابيزات الشارع و نصلى المغرب فى الحسين
امتى يا جماعة قالوا نكون هناك على خمسة و ربع
نزلت من بيتنا على اربع و نص و قلت هاخد طريق صلاح سالم للازهر
فى نص الطريق اتصلت بى واحدة من اصدقائى و قالت لى اركنى فى الباركينج بتاع الدراسة علشان مفيش اماكن غير هناك
اوكى هو بعيد شوية بس مش مهم المحلات فى شارع الحسين جميلة اهو اتفرج عليها
وصلت هناك و كالعادة الفتحة اللى قدام الباركينج مقفولة ولازم الف من قدام
قدام ده فين بقى ؟ من تحت كوبرى الازهر فى اول الشارع
واكتر من نص ساعة علشان الف و ارجع للباركينج
الادان ادن .. مش مهم لسه بيكون فى اقامة و هالحق الصلاة
وصلت اخيرا للباركينج .. اسفين مفيش اماكن البارك اتملى
هركن فين انا طيب ؟؟ ... دورى حضرتك على ركنة فى اى شارع جانبى
لفة تانية .. امرى لله مش مهم اكيد هلاقى مكان
لاقيت شارع جنب الحسين واحد قالى تركنى قلت ايوه يا ريت
قالى تعالى ادخلى هنا بس سيبى المفتاح .. ليه ؟؟ .. علشان انا هركنها فى وسط الشارع و لو حد حب يخرج اخرجه
رميت له المفتاح و جريت
اهلا احنا صلينا خلاص .. تعالى بقى نفطر الاول و بعدين تبقى تصلى .. طيب
المكان زحمة جدا .. و مكاننا فى وسطها و كل اللى رايح و جى بيخبط فينا .. مش مهم
وصل الاكل !!!!!!!
ايه ده ؟ عصافير ولا حمام ؟ ده كباب ولا عضام ؟؟ الرز فى العصافير اقصد الحمام نى لسه
و الباقى بيعانى فى الشد و المضغ .. مش مهم الرز مضغه اسهل
ندهت الرجل .. فين الخشاف ؟؟ .. ما هو ده يا انسة الكركديه ده .. الكركديه هو الخشاف !!؟؟ .. مش مهم اهو حاجة مسكرة و خلاص
كلمت امى فى الخباثة ..(ماما اعملى حسابى فى الفطار لحسن الاكل وحش قوى)
طبعا الولد اللى حجز فى نص هدومه و الكل بيهزء فيه .. قلت خلاص مش مهم يا جماعة المهم اننا مع بعض
الحمدلله انتهت مهمة الشد و الجذب مع الاكل و قررنا نغسل ايدينا و نمشى
اول واحدة راحت و رجعت قالت لا اوعى تروحوا تغسلوا ايديكوا امسحوها بمنديل او حتى فى هدومك ارحم .. نو كومنيت
طيب استاذن انا يا جماعة اصلى .. و قد كان .. بس جيه فى بالى سؤال وانا ساجدة .. ريحة الجزم الرهيبة دى جات منين بالرغم ان الواحد بيصلى من غيرها !!!؟؟
خرجت من الجامع ..اخيرا هواء نضيف .. احمدك يا رب انى لحقت اجرى قبل ما اترش بالمسك الحسينى الشهير
ها هنعمل ايه ؟؟ .. نقعد على الفيشاوى طبعا اى مكان تانى لا .. طيب
الحمدلله وصلنا فى الوقت المناسب ..مكان لسه فاضى اهو بس جوه .. مش مهم الاهم اننا هنقعد فيها
القهوة جميلة و فيها تحف و شغل يدوى للمشربيات حلو قوى .. بس لو شاطر تقدر تشوفه من الدخان
الجو حر قوى و مليان دخان و كل شوية حد يدخل بيبع حاجة و منهم اللى بيزن و يتحايل
كأن الواحد فى سوق من الولد بياع المناديل للراجل بتاع الساعات المضروبة لبتاع لمبات الجاز الصغيرة و هو بيميل على كل اتنين -ولد و بنت - و يقولهم لمبة حبنا
و بتاعت الفل - فل ؟؟ ده اكيد رحته بقت تفاح او معسل - بتاعت السودانى اللى بقشره - بتاع القرود - بترمى شوية على كل ترابيزة و لو شاطر تلم او تدفع يا حلو
و بتاع المحافظ و الاعقاد و كتابة اسمك على رزة .. الخ الخ
اغرب حاجة بتاعت الحنة يترسم حنة للناس على القهوة .. ازاى يعنى ؟؟ .. و يغسلوا ايديهم و رجلهم فين منها ؟؟
مش مهم اهى ارزاق و كل واحد بيجرى ورا رزقه و اهو موسم لهم
و فجاة
دخلت واحدة معها رق و بتقول بدور على محبوبى بصوت عالى و تميل على الولاد و الرجالة و تقولهم انت محبوبى و تروح قرصاه فى صدره
و ابتدات تسال البنات و الستات متعرفوش محبوبى فين و بتقرصـ ... قلت لا لحد هنا و نقوم ..بياعين و دخان و حر ماشى لكن مجانين لا لا لا
و قمنا- الحمدلله قبل ما توصل لنا الست دى
طيب الساعة تمانية لسه .. هنعمل ايه ؟؟
نروح الدرب الاصفر او وكالة الغورى فى اماكن هناك بتعمل حفلات جميلة .. ايوه يلا اخيرا هنعيش الجو بجد
و بعد معاناة من تخبيط فى الناس والعساكر الملين المكان -علشان السياح - و البايعين واصحاب القهاوى اللى بتشدك علشان تقعد عندهم و الرجل المجذوب اللى بيصرخ فى ودنك وحدووووووووه و يعميك بدخان بخوره
وصلنا هناك .. و كان الرد .. لا لسه الحفلات على يوم خمستاشر
هنعمل ايه ؟؟
هنا بقى صرخت و قلت لا خلااااااااااااص نروح كفاية لحد كدا
و لاقيت كل واحد مرحب جدا بالفكرة بس مكسوف يقول علشان الصحبة الحلوة
.
.
.
.

و انا راجعة مر على بالى المكان تانى بعيد عن عيوبه
الازهر .. قبته و مأذنته و هم منورين انوار اخضر فاتح فى اصفر مع السما البرتقالى الغامق
الفوانيس النحاس ام شمعة بفصوص ازاز ملون .. الابريق و الطبق و الترابيزات المحفور عليهم رسومات عربية
المغنى العجوز القاعد فى ركن اى قهوة بيغنى اغانى قديمة على عوده بمزاج و بطريقة مختلفة
قماش الخيامية بالوانه .. فساتين و بدل الرقص اللى بتعكس انوار كتير على الترتر بتاعها..العود بالوانه البنى فى العسلى فى الاصفر.. الرق و صاحبته الطبلة اللى بيغروا الواحد انه يمد ايده و يضرب عليهم و لو ضربة بسيطة
شغل الصدف بلمعته .. و الفضة و هى واخدة فى حضنها الاحجار الكريمة
لمة الاهالى و الاصحاب و فرحتهم برمضان


هو ده المهم :)